ایران کی واشنگٹن کو آبنائے ہرمز سات دن میں دوبارہ کھولنے کی پیشکش

بی بی سی عربی کے مطابق ایران نے امریکہ کو ایک ایسا معاہدہ پیش کیا ہے جس کے تحت آبنائے ہرمز کو سات دن کے اندر دوبارہ کھول دیا جائے گا۔

ایرانی تجویز سے متعلق ایک سوال کے جواب میں امریکی اہلکار نے بی بی سی کو بتایا کہ دونوں فریقین کے درمیان ثالثوں کے ذریعے فی الحال "تعمیری مذاکرات" جاری ہیں۔

امریکی اہلکار نے ان ثالثوں کی نوعیت یا ان مذاکرات کے ممکنہ ٹائم لائن کے بارے میں مزید تفصیلات فراہم نہیں کیں۔

آبنائے ہرمز عالمی سطح پر تیل کی برآمدات کے لیے ایک اہم گزرگاہ ہونے کی وجہ سے غیر معمولی اسٹریٹیجک اہمیت رکھتی ہے، جس کے باعث اس کے کھلنے یا بند ہونے سے متعلق کوئی بھی پیش رفت بین الاقوامی توجہ کا مرکز بنی رہتی ہے۔